| Un'ètra diciaraziån dl'autåur |
|
Quèlch mî ringraziamänt a i inferéss a chi umàn ed superiåur prêgi ch'a scuvrî, in an rigoråuṡ diṡôrden antianalfabêtich, a ridòs di nómm "Gigi Picetti", "Alessandro Testa", "Max Morando", par al contribót ch'i m an furné in prémm lågh eṡiständ, mo quasst an é brîṡa merit så, e in secånd lågh avänd apropriatamänt e sincronicamänt interagé con mé, ważvàira mé, ossî l'autåur ed st'lîber e ed sti réghi, dånca, ai efèt anagrâfich, Roberto Quaglia, sostituändes adiritûra a mé int al sucitè rål ed autåur in tótti cäli lêtri che mé a milànt d'avair scrétt anc avänd, a l'inézzi ed ognóna ed låur, oscuramänt aluṡ a un misteriåuṡ rål che i summenzionè personâg̈ i avrévnen rivesté int la redaziån dla medéṡima, e quasst l'é merit så. An i avî capé gnínt? Méi acsé! L'impurtànt l'é ch'i l âbien capé låur. L'é a låur ch'a destinèva quèlch mî ringraziamänt. Brîṡa a vuèter. E s'anc låur an avéssen brîṡa capé... beh, ch'i m al dîghen e mé a i al spiêgh a våuṡ. A ringrâzi comónqued anc chi dû o trî èter amîgh ch'an ò brîṡa qué menzionè par al contribót che anc låur i m an furné eṡiständ, pûr an eṡänd quasst evidentemänt merit pròpri så. D'ètra pèrt, an é gnanc merit mî.
|
