Astounding Quagliaspace, ò sa o stranio mondo de Roberto Quaglia

Analogaménte a-o spaçio mentâle de ciascùn, Astounding Quagliaspace o l'é 'n riflèsso singolâre de l'univèrso, qualónque cösa l'univèrso o segge a-o de feua da mente de quarchedun. Viagiâ a tràverso Quagliaspace o l'é 'n pò comme vegnî a contàtto con Roberto Quaglia mæximo, qualónque cösa Roberto Quaglia o segge a-o de feua de lê. Quello che s'incontra in Quagliaspace o aparten a-a Grànde Famìggia de-e Tracce de Quaglia, vâle a dî quella ròbba ch'avansa quàndo quarchedun ch'o se ciamma Quaglia o existe sénsa fâne 'n segréto ch'o no serviæ. O mondo virtuâle into quâ t'é crédi de trovâte in sto mæximo moménto (t'é ò no t'é convìnto de "èse in sce Internet"?), ch'o ténde a risciûâte drénto a-o monitor donde i teu euggi se son za pèrsi, o l'é sólo ûnn-a de-e ciù ténue e insignificànti estensioìn de l'ûnico, vêo, ànpio, intêgo e complèsso Astounding Quagliaspace ch'o l'é stæto creòu da-o mæximo Roberto Quaglia inta seu mente, coscì che a seu mente a poésse creâ Roberto Quaglia. 'N trùcco ch'o fonçióna e o dûa. O miâcolo da creaçión de lê do nigùn, e de pù da ricreaçión de lê da l'identitæ precedénte lóghera e lasciâ. Bón apetîto.

...o l'éiva decîzo de vîve eternaménte, ò de moî into tentatîvo.
(Joseph Heller)

Roberto Quaglia, photo by Konstantin Krasnobaev, Moscow, 2006

Co-o trùcco de l'audiovixîvo Roberto Quaglia adesso o se möve ascì! E o pârla! Schiscia chì de d'âto pe védde 'na stragna intervista a Roberto Quaglia da dûâ de 'n'ôa. O fæto o l'é sucèsso inta stæ do 2003 in Ungerîa. O sonóro o l'é in ingléize.

Zùgno 2017. A Teheran, Iran, Roberto Quaglia o vegne intervistòu da Teša Tešanović e o téma da discusción o l'é o mondo reâle - a-o de là de-e cortìnn-e fumógene di miti e di ingànni. L'audio o l'é in ingléize, dòppo 'n preàmbolo in sèrbo-cròato.

Lùggio 2004. O grànde scritô americàn Rober Sheckley o l'é mæ òspite a Zêna pe quarche méize. Eccove 'n'intervista, da mì realizâ a Zêna Quìnto. 'N anno dòppo, Sheckley o vegniâ pe desgràçia a mancâ. O sonóro o l'é in ingléize.

Agosto 2004. A Bucarést, in Romanìa, o va in onda in televixón 'n talk show davéi inconsùeto. Robert Sheckley, Ian Watson e o sottoscrîto parlémmo pe 'n'ôa de fantasciénsa. Moderatô, Alexandru Mironov. O sonóro o l'é in ingléize.

Se pensæ che i âtri video s'én tròppo difìcili pe voiâtri, poéi consolâve con sto curto video de benvegnûo in sciô mæ scîto, sénplice sénplice, fàcile fàcile da capî. E o l'é ascì quæxi in italiàn!

>> ÂTRI VIDEO <<

OPZIONI

BIOGRAFÎA	Chi son? Chi no son? Perché son chì pur essèndo ascì in âtri pòsti? Tùtto quello che no savéivi de voléi savéi in sce Roberto Quaglia e ch'o te zoviâ 'n pò. Opûre nò.
ÒPERE LETTERÂRIE	'N milión de paròlle. Eccove cöse contègnan i mæ lìbbri mìssi insémme. Acomòdite. 200.000 paròlle te-e regâlo chì. No fîdâte de quello che vêuan dî. E paròlle no existan a-o de feua da nòstra tésta, ch'o l'é tùtto dî.
FANTASCIÉNSA	Cöse gh'intro mì con a fantasciénsa? ma de pù: cöse gh'intra a fantasciénsa con mì? Indaga in sciô lâto oscûro da fantasciénsa italiànn-a.
FIGÛE	Ideâle pe chi no sa léze e inta vìtta comme inte l'aldilà o preferìsce ammiâ sólo e figûe. No te preocupâ: primma ò dòppo o sucède a tùtti. A mì o l'é sucèsso. Pöi o passa. Opûre nò.
VIDEO	Se a televixón a l'é o nemîgo che no t'arîvi a scapâ, eccote quarche video donde mì e âtri se compiâxémmo de vaneggiâ pe confónde e idêe a chi ne véde. Piggia in màn a teu vìtta! Sciêgli tì a quæ confuxón mentâle èse soggètto! Se t'æ 'na conesción internet a banda lèrga o sballo o l'é garantîo.
SÀTIRA	O pâ che a tànta génte ghe piâxe a sàtira. Mì no ho miga ben mâi capîo cöse a segge, però 'na vòtta che me son distræto a l'ho fæta. Primma ò dòppo a fémmo tùtti. L'importànte o l'é no afeçionâsene e savéi quàndo tiâ a caténa.
AMIXI	Ascì sénplici conoscénti e desconosciûi. Desconosciûi pe voiâtri, benintéizo. Mì i conòsco. E son di gêni opûre tèste de belìn ò nisciun di doî ò tùtti e doî. Insomma 'na cösa 'n pò comme l'umanitæ, ma in pìccolo. Ò fórse in grànde, me confóndo sénpre, probabilménte apòsta. Cöse importa?
SHECKLEY	Robert Sheckley o fa categorîa a lê. O l'é pàrte da mæ vìtta e mì son stæto pàrte da seu. Émmo viagiòu insémme pe di méixi e abitòu insémme in diversci perîodi e pòsti. Chì treuvæ tùtte e imàgine relatîve.
IAN WATSON	Ascì Ian Watson o fa categorîa a lê. O ciù brillànte scritô britànnico segóndo i mêgio crìtici. Da quarche anno sémmo mòlto amîxi e émmo scrîto 'n lìbbro insémme. Chì treuvæ i ligàmmi a quarche nòstra òpera a 4 màn e fòto de viaggi che émmo condivîzo.
UMANITÆ VÀRIA	Gh'é génte che no conòsco e pùre a existe o mæximo da quarche pàrte. Tànti no làscian in mì tracce che mì me regòrde. Âtri invéce scì. Eccone quarchedun.
RASSEGNA DE STAMPA	Avànsi fòssili de tracce de vìtta sótta fórma de efêmeri segnétti in sce di feuggi de carta che rispètto a-a carta igènica dûan sólo 'n pò de ciù e son quæxi sénpre meno necessâri. E gh'é génte ch'a ghe créde. Se tì t'é coscì, acomòdite. Pe piaxéi pöi a caténa.
GUESTBOOK	Primma ò dòppo o riativiò. Opûre nò. Se t'è veu pèrde ténpo con di vêgi coménti assortîi, pröva pûre.
POLÌTICA	O pâ incredìbile ma inta vìtta m'é capitòu de fâ ascì polìtica, ò ciùttòsto a polìtica a s'é fæta mì fìnn-a a-o giórno into quâ a l'ho mollâ. Comunque, ninte de sêrio. A l'é stæta sólo 'na faccénda de sèsso. Pe feticìsti e vardoìn, eccove comme a l'é andæta.
GUSTI	Banâle elénco de cöse che me piâxan. Ûnn-a de quelle cöse che se métte inta seu homepage pe sénplificâ a seu personalitæ a-i euggi do visitatô impaçiénte.
LIBRERÎA	Primma ò dòppo ghe mettiò 'na selezción de gràndi lìbbri in gràdo de rénde a vòstra vìtta mòlto ciù bèlla, se sólo pöi voiâtri i lezésci. Inta-o fratténpo gh'é quarcösa, ma no me regòrdo cöse.
POSTER	Se tùtto o t'anêuia, fórse t'æ bezéugno d'apénde 'n poster inta teu camerétta. Magâri 'n poster con 'n gròsso cûo incombénte. Opûre quarcösa de meno rafinòu.
CONTRIBÛTI	Pe quànto o pòsse de prinçìpio paréi stranio, contribuî in mòddo attîvo a-a mæ vìtta o l'é sénplice e a-a portâ de tùtti. Chì ve dàggo ascì 'n òttimo suggeriménto in mêito.
PÀGINA PRINÇIPÂ	Gh'é ascì di inbecìlli che quàndo vàgan spaezæ inte 'n scîto finìscian sénpre pe tornâ a-a copertìnn-a. Sto ligàmme o-i veu agiûtâ.

	POSOLOGÎA
	Ninte poîa d'intrâ in Quagliaspace! O l'é comunque tròppo tàrdi. Se no t'æ smìsso de léze ti gh'é za drénto. Avertênse: Quagliaspace o l'é controindicòu a-e mùmmie. O l'é spésso resultòu letâle pe-i cadàveri. Ascì i zombi córan quarche rîschio. Se ancón ti stæ lezèndo, certaménte ti no t'é 'n cadàvere, probabilménte ti no t'é 'na mùmmia, e fórse manco 'n zombi. Ò fórse scì. Boh? O fa davéi diferénsa? Benvegnûo dónca in Astounding Quagliaspace! Ch'o pâ scrîto in ingléize ma invéce o l'é italiàn. E se ste pàgine te piâxan suggerìscile a-i teu amîxi de carne e quelli eletrònichi. E za ch'ti gh'é métti 'n ligàmme in sce-e teu pàgine, se ti l'æ, e magâri ascì se no ti l'æ. No te scordâ che a-e sètte t'aspéitan donde ti sæ ben pe fâ a pipì.	...e questo, o l'é sólo o prinçìpio. Se Internet o no collasiâ, se o Mondo o no collasiâ, se o Sistêma Solâre o no collasiâ, se a Vîa Làttea a no collasiâ, se l'Univèrso o no collasiâ, se Roberto Quaglia o no collasiâ, Astounding Quagliaspace o se sviluppiâ indefinitivaménte, in cèrca de 'na sénpre ciù gràn seu incredibilitæ, a qualitæ de l'ecelénsa pe ecelénsa... opûre nò, l'assolûto contrârio e ascì o contrârio do contrârio do contrârio de tùtto questo. O çervèllo o ve s'é spapolòu? Òttimo. O l'é ciù digerìbile coscì. Sénpre desfidâ de-e paròlle, o Cavàllo de Tròia de Tùtte e Mistificaçioìn! D'âtra pàrte quarcösa dovéivo pûre scrîve, pe permétte a sta seçión de tèsto d'ocupâ 'n'ârea sìmile a quella do trafilétto chì da-o cànto. No créddo ch'a serve âtre paròlle.

Otre che a livèllo mìtico, da ancheu Roberto Quaglia o existe ascì in ténpo reâle, armeno in teorîa. Pròpio coscì! Potére da QUAGLIACAM™ . A fòto a drîta a l'é con tùtta probabilitæ a ciù recénte de-e imàgine existénti de Roberto Quaglia. Con 'n pò de fortûnn-a (ò de sfortûnn-a) ti pêu védde cöse o stâ fasèndo RQ (che pöi saiéiva mì) in sto mæximo moménto. Quàndo a QUAGLIACAM™ a l'é impîa, l'imàgine a vegne agiornâ ogni 5 minûti. Quàndo a l'é stûâ, se véde l'ùrtima imàgine registrâ. Se a carêga a l'é veua, veu dî che quello che ti védi no son mì. A dæta e l'ôa in sciâ fotografîa a l'é relatîva a-o pianéta e fûzo orârio do pòsto into quâ me treuvo (spésso o no l'é in Italia). Tànti visitatoî m'an però fæto notâ che spésso l'imàgine a no l'é stæta agiornâ da éutto ò nêuve méixi. Mì créddo a costôro, e coscì dovéi fâ ascì voiâtri. Son tròppo saviaménte pìgro pe controllâ se ho 'na webcam impîa inti mæ dintórni. Spésso in efètti a no gh'é.

= RQ HIC ET NUNC

ÛRTIMI PÀRTI

Lêzi a recensción numero ûn
Lêzi a recensción numero doî

VEU APROFONDÎ?

Pensiero Stocastico o l'é 'n lìbbro ch'o racòglie e cöse ciù stragne tracimâ da-o çervèllo de Roberto Quaglia. Léze pe crédde. Ò pe no crédde. Pe sballâ. Ò rinsenî. Léze pe léze. Digerî pe digerî. Vîve pe vîve. Amâ pe amâ. Opûre nò.

Sto corpózo volûmme de 450 pàgine o racòglie dêxine d'artìcoli americàn de controinformaçión. Conpréizo 'n lóngo artìcolo de Roberto Quaglia in sci-i fæti de l'11 de seténbre. O l'é o primmo artìcolo de l'antologîa, recensîo ascì in sce Repubblica, in sciô Venardì de Repubblica (1 e 2), in sce Liberazione e quarche dêxinn-a d'âtre testâte.

Se voéi contatâ sto mutante
che co-o ténpo o càngia a seu fàccia,
saéi cómme fâ.

Se no o saéi, SCHISCIÆ CHÌ

Se pròpio no ghe riuscî, anæ a fâve benedî

Ùrtima mòdifica, 2 de frevâ do 2006

Tûtti i tèsti e e figûe contegûî in "Astounding Quagliaspace" se pòan léze, ammî, adorâ, scarigâ in sciô conputer, stanpâ e apíccâ inta seu càmbara, e copâ sénsa límiti, SOLO PE ÛZO PERSONÂLE. Tûtti i tèsti e e illustraçióin sòn proprietæ de Roberto Quaglia e no se pòan dêuviâ in tûtto ò in pârte sénsa autorizaçión. O progètto gràfico e e conponénti gràfiche de stè pàgine sòn proprietæ reservâ de Roberto Quaglia. Nigùnn-a de stè côse a se pò mette in véndita ò comerciâ a nínte títolo sénsa autorizaçión previa.

Métti 'n ligàmme a ROBERTOQUAGLIA.COM


	Eccove quarche bottón che ti pêu adêuviâ pe ligâ a sto scîto SCHISCIA CHÌ pe trovâ ÂTRE gràfiche tra e quæ sciêglie