Intervénto de Roberto Quaglia (Lista Pannella)
Quàndo êo figgeu e andâva a scheua, me regòrdo che tra e diverse cöse me fû insegnâ a gróssi tràtti a stòria d'América. Un di fenòmeni ciù raccapriçénti che ne insegnâvan da stòria d'América o l'êa l'abominio da colossâle tràtta di sciâvi che sêcoli fa a segnò 'na intêga epòca. I mercànti de sciâvi approdâvan co-e lô nâvi in sce-e cöste africànne, irrompéivan armæ tra e indiféize tribù locâli e letteralménte rattâvan mijæ e mijæ d'èse umàn che comme bestiàmme vegnîvan trasportæ in América pe èse redûti in sciâvitù inti cànpi de cotón e in âtri pòsti. Pöi ghe fû a guèra de secescion. Comme sémmo, vìnsan i nordìsti, a sciâvitù a fû abolîa, e tùtto o fû ben quello ch'o finì ben.
O l'é dónca fórse in virtù de sto nòstro comûne retàggio culturâle che inti ùrtimi anni ho dovûo rendime cónto con cresciénte sgoménto che sti orroî do passòu, i quæ - ritégno - continuan a èse insegnæ inte-e scheue italiànne comme tâli, son tùtt'âtro che mòrti e sotterræ. Pézo, sti orroî son tra niâtri, tra niâtri italiàn, tra niâtri zenéixi, e ecco perché a facénda a riguârda da vixìn ascì o nòstro Conseggio Comunâle, perché niâtri, niâtri italiàn, niâtri zenéixi, sémmo a pìn tìtolo partécipi a sti orroî, ascì se, pe raxoìn de bascìscima conveniénsa, ben pöchi de niâtri an car de rendisene cónto e preferìscian asconde a sé e a-i âtri sto infàmme stâto de-e cöse.
Pe chi o segge coscì òrbo da no avéi ancón capîo de cöse diâscoa stàggo parlàndo, speçìfico che me riferìscio a-a tràtta d'èse umàn a scòpo de sfrutaménto sessuâle. 'N particolaregiòu e atendìbile stûdio de Caritas, Parsec e Univerxitæ de Firenze o stìmma che ghe segge ancheu in Italia da 19.000 a 25.000 figge foestê dedicæ a-a prostituçión, a quæxi totalitæ de-e quæ a se trêuva in regìmme de sciâvitù. Repéto o concètto: da 19.000 a 25.000 figge, a quæxi totalitæ de-e quæ a vîve in vêo e pròpio regìmme de sciâvitù! O no l'é 'na mæ opinión, scignôr Prezidénte, scignôr Sìndaco, scignoî e scignôe coléghi. Se tràtta de 'na situaçión oggettîva de fæto, emergénte in mòddo incontrovertìbile da-i atti de 'n recénte seminâio promòsso in própòxito da-a Caritas Italiana, i ciù significatîvi argoménti do quæ son stæti da mì pîgi tra e premésse inta moçión che stàggo illustràndo e dónca no i repéto pe estéizo inte sto mæ intervénto.
Dónca dêxine de mijæ de sciâve tra niâtri, comme dêxine de mijæ de sciâvi inte quella lontàna América sciavìsta che a paròlle - ahinoî spésso sólo a paròlle - sémmo tùtti coscì prónti a condanâ sénsa dúbbi, né apèllo. Çèrto, o no l'é a mæxima cösa, o diâ quarchedun. Ma, rispóndo mì, e diversitæ ch'ascì ghe son no ne fan onô nisciun, perché se tràtta de diferénse apparénti e no sostançiâli, 'n vélo ipòcrita con funçioìn d'àlibi pe-e cosciénse.
Eh, za, scignôe e scignoî mæ, a sciâvitù in Italia ancheu a existe, ma a-i uténti finâli de sto abominio - quelli pe-i quæ o vegne fæto - no ghe fa còmodo savéi che de sciâvitù se tràtte. O rovineiæ magâri o lô piaxéi cärnâle. A sciâvitù modèrna a se travèste pe evitâ scrùpoli de cosciénsa a chi o fa ûzo di servìçi ch'a offre. A Zêna comme in Italia, scignôe e scignoî mæ, ancheu se va a bagàsce - e me perdoniéi se çìto a Realtæ co-o lenguàggio da realtæ - inta errònea convinçión de pagâ 'na lìbera figgia ch'a l'à liberaménte sciêlto de fâ prestaçioìn sessuâli in cànbio de dené. Invéce, inta maggioransa di câxi, o no l'é pe ninte coscì. A realtæ a l'é diversa da comme pe conveniénsa a pâ. A ciù gran pàrte de-e figge a vegne atirâ into nòstro paéize co-o ingànno, e 'na vòtta chì, da niâtri, in Italia, 'n paéize che ne piâxe créddilo lìbero, a vegne redûta in sciâvitù.
Andàndo a çercâ o pélo inte l'Òmmo, o no l'é pe ninte infondòu suppónne che ascì a-i ténpi da sciâvitù in América, i beneficiâri di servìçi fæti da-i sciâvi i avéssan pòca cosciénsa de l'aspètto riprovévole do fenòmeno a cui êran partécipi. Dòppotùtto, no êran lô avéi rattòu èse umàn e avéili redûti in sciâvitù. Lô pagâvan i sciâvi a-l'atto de l'acquìsto, dónca i alogiâvan e nutrîvan vìtta natûral duànte in cànbio do lô travàggio. Probabilménte, a-i lô euggi no gh'êa ninte de stràno e riprovévole. Dòppotùtto, ascì ancheu o mondo lìbero o l'é pìn de persónn-e che co-o lô travàggio riescian a fadîga a garantîse o necessâio vìtto e 'n alòggio. Pe no parlâ di sénsa-travàggio inti paéizi donde a no travagiâ se mêue sùbito de famme. I sciavìsti americàn i avéivan dónca probabilménte 'n'òttima opinión de sé e de quello ch'i fâvan, perché evidenteménte no vedéivan in questo ninte de mâ, pròpio comme tànti çitadìn italiàn, ancheu, ritégnan perfettaménte normâle e conveniénte vâlise ciù ò meno sistematicaménte di servìçi sessuâli de-e sciâve a lô offèrte pe strâda. O gèsto de pagâ a prestaçión in efètti o lìbera o cliénte da ògni sospètto d'avéi abuzòu de 'na sciâva. Ma niâtri sémmo che quelli dené andiàn a finî inte-e stacche di sciavìsti, a-i quæ quelle figge letteralménte apparténgan.
In ciù, gh'é da consciderâ 'n âtro argoménto: A psìche umàna a l'é ben curiôza materia. I èse umàn, de pù quàndo son zoêni, acquìstan l'identitæ pròpia in bâze a quello ch'abitualménte fan. Raxón pe-a quæ, a ciù gran pàrte de ste figgétte sbatûe in sciô marciapê contra a lô voluntæ, dòppo quarche ténpo se rasségnan a èse quello ch'én stæte costréite a divegnî. Questo o no vâle da àlibi pe nisciun. Ascì a-o ténpo do sciavìsmo in América, a 'na gran pàrte di sciâvi a-a fìn no restâva âtro che l'identitæ de sciâvo. Tànti de quelli che là zu nascéivan sciâvi, no seunâvan pe ninte de vegnî 'n giórno liberæ, tànto i êran ascì mentalménte sciâvi. Tùtto questo o no giustìfica né o sciavìsmo d'allóa, né quello d'ancheu.
Ma quello che veraménte o m'inquêta, dêvo confessâ, o no l'é esattaménte o fæto che ancheu in Italia, e ascì ancheu a Zêna, o segge praticòu o sciavìsmo e che i çitadìn italiàn e quelli zenéixi ne sìggian i uténti. Da-a massa di èse umàn, ciù de tànto me son rassegnòu a no aspeitâme. Quello ch'o m'inquêta o l'é che e istituçioìn mæxime da nòstra soçietæ civîle sìggian praticaménte inèrti e indiferénti de frónte a 'n tâle stâto de-e cöse. Chì e là quarchedun o s'indigna, o l'é vêo. Ma son indivìdui izolæ. E sèrvan a pòco. E istituçioìn in quànto tâli son in sto própòxito férme, immòbili, do tùtto inùtili, in tùtt'âtre facénde inpegnæ. Sto stâto de-e cöse o dêve cangiâ rapidaménte. O l'é intolleràbile che 'n paéize ch'o se dîxe civîle, into quæ tùtti fan a gâra into tutelâ i dirìtti de quæsìasi un purché a facénda a garantìsce ritórni econòmichi ò eletorâli, se tegnan i euggi fortìscimamente serræ pe no védde e no contrastâ a vergognôza violaçión di dirìtti umàn che into nòstro paéize ancheu se cónpie co-o perduànte sfrutaménto sessuâle coàtto de zoêne figgétte foestê ch'an seunòu 'na vìtta mêgio into nòstro paéize, e a-e quæ o nòstro paéize ancheu invéce o riserva sólo sciâvitù e stùpri. Se e mæ paròlle sêunn-an melodramàtiche a quarchedun, garantìscio ch'e son invéce assæ meno dramàtiche de-e efferatésse che e figge deportæ - Scì! Deportæ! - into nòstro paéize son costréite a subî. O 25 d'arvî passòu, Fèsta da Liberaçión - e Dîo sólo o sa quànte mijæ de figgétte foestê ancheu in Italia sêunn-an d'èse liberæ da-a lô deportaçión in Italia - o 25 d'arvî passòu vixìn a Trezzo sull'Adda, vegne ritrovâ 'na figgia albanéize mòrta. O lâto mancìn da fàccia o l'é divèlto da trêi cōrpi de martèllo. O còrpo o l'é squartòu da-a trachêa a-o pûbe e da rognón a rognón. Squartòu a cróxe pe estrâe o figgeu de trêi méixi ch'a stâva alevàndo in grénpo. Squartâ plateâlmente pe mostrâ a-e âtre sciâve cöse o saiæ sucèsso a quæsìasi un o l'avésse tentòu de sfuzî a-a prostituçión conçepìndo 'n figgeu. Ascì questa a l'é l'Italia ancheu. Gh'é da arvî i euggi, rendisene cónto e agî de conseguénsa.
A Zêna, comme into rèsto d'Italia, se vìolan ancheu di dirìtti umàn! Quànte vòtte sto Conseggio o s'é fermòu a spénde paròlle pe commemorâ orroî lontàn into ténpo, pe stigmatizâ i dirìtti umàn violæ in âtri pòsti? Tùtto o va ben, tùtto o l'é sacrosànto e niâtri o sémmo ben, ma a pàtto de no trascurâ l'orrô ciù gròsso de tùtti pe vîa do fæto ch'o ne riguârda dirèttamente essèndone niâtri partécipi. Scì, partécipi! Donde no gh'é domànda, no se sviluppa 'n mercòu. A tràtta de-e sciâve in Italia ancheu a gh'é perché a tànti italiàn ghe fa còmodo ch'a ghe segge, ascì se pe vigliàcca ipocrixîa lô fìnzan ch'a no ghe segge, e perché a-i âtri italiàn, che de-e sciâve no se sèrvan, do destìn de quéste o ghe inpòrta pòco pe no dî ninte.
Quàndo a Frància a l'à da pòco fæto e nòte esplosioìn nucleâri, 'na pàrte de niâtri italiàn a l'à boicotòu o mercòu di prodûti françéixi. Perché nisciun de sti virtuôxi o l'à mâi domandòu a gran vôxe de boicotâ o mercòu da prostituçión sciavìsta? 'Na pàrte de niâtri italiàn ògni tànto ascì a invòca a gran vôxe o boicotàggio de 'na réte televixîva ò l'âtra. Perché nisciun de sti virtuôxi o l'à mâi domandòu a gran vôxe de boicotâ o mercòu da prostituçión sciavìsta? In Italia voentê se boicòtta de tùtto: da-e tàsse a-e régole, da-e pélisse de vizón d'alevaménto a-i lìbri di inteletuâli no d'alevaménto. A-i referendum. Lóntan da mì o gèsto de contestâ e raxoìn de nisciun boicotàggio. Ognidun o l'é lìbero de boicotâ quello che ciù ghe garba. Però me domàndo: Perché nisciun de sti virtuôxi o l'à mâi domandòu a gran vôxe de boicotâ o mercòu da prostituçión sciavìsta?
Quello ch'o mànca in sto própòxito in Italia, o l'é a consapevoléssa de quànto o stâ sucedèndo. I cànpi de concentraménto nazìsti e o stermìnio di ebrêi fûn poscìbili perché nisciun allóa in Germània, a pàrte i geràrchi nazìsti, o l'à savûo ò vorsûo savéi cöse o stâva sucedèndo. A sciâvitù ancheu in Italia, fæte e debite proporçioìn, a prospera pe-e mæxime raxoìn: l'indiferénsa e a çechitæ de tùtti che làscian màn lìbera a pöchi criminâli.
Cöse poscémmo fâ niâtri, o nòstro pìccolo e modèsto Conseggio Comunâle, pe fronteggiâ con dignitæ sto indégno stâto de-e cöse? No mòltìscimo, in veitæ. Ma manco pòco. In realtæ, poscémmo fâ esattaménte tùtto o poscìbile, ò sa quello ch'o ne vegne in mente de podéi fâ in própòxito, e ch'o l'intra inte-e nòstre facoltæ de fâ. Me son conçèsso 'na tautologîa, pe evidençiâ o nòstro dovéi de no lasciâ ninte d'intentòu pe fronteggiâ comme se dêve sto génere de situaçión.
Primma de tùtto, dovémmo rendise pinaménte cónto da gravitæ do problêma. Dúbito che sta consapevoléssa za a ghe segge, inte sto Conseggio, inta dovûa mizûa. Me regòrdo che quàndo pe-a primma vòtta, in conferénsa di Cap'di-grùppo, ho menzionòu o fæto d'avéi in lavoraçión 'na moçión in sciô problêma da sciâvitù a Zêna, ho suscitòu ilaritæ in quarche coléga - e ascì inte 'n assessô! In sto própòxito, çìto testualménte e paròlle de recénte pronunçiæ da-o Minìstro Livia Turco: "...discorrèndo da "tràtta" con 'na giornalìsta za sensìbile a-o problêma, ho notòu che a mæ interlocutrîce a restâva 'n àtimo attònita pe-o tìpo de terminologîa adêuviòu da mì."
Son paròlle do minìstro Livia Turco. Assistémmo sénsa védila - i euggi foderæ de persùtti televixîvi - a 'na vêa e pròpia tràtta de-e sciâve, che a cosciénsa a sténta a cattâ in tùtta a seu efferatéssa, tànto a pâ sciortîa da 'n improbàbile incûbo de scûri ricórsci medievâli. E pûre, dovémmo rendise cónto da gravitæ da situaçión, senò mâi aviêmo a fòrsa de pensâ e de fâ quarcösa de realménte ûtile vèrso o superaménto de sto dràmma.
Sénpre o minìstro Livia Turco, inta mæxima ocaxón a asserîva: "O saiâ dónca giùsto o coinvolgiménto a livèllo locâle de-e Amministraçioìn, perché lô intervegnan e sostegnan e propòste e se fàssan cârego do problêma." Son d'acòrdio. E çittæ son o pòsto donde o problêma o s'afèrma e o se concéntra. O l'é inte-e çittæ che l'infeçión da sciâvitù modèrna a l'à i seu pézo focolâi, o l'é inte-e çittæ che se dêvan mobilitâ i anticòrpi pe tornâ a 'na sanitæ civîle dégna de tâle nómme. Émmo pöche ârme. E dovémmo adêuviâ tùtte. Dovémmo pe primma cösa prevédde e rénde velocemente operatîve struttûe in gràdo d'accêugge e protêze tùtte e sciâve che decidéssan de tentâ a fûga da lô orrénda condiçión. O l'é 'n imperatîvo inprescindìbile. Comme Amministraçión, no aviêmo fórse o podéi de strappâ fixicaménte e vìttime a-i lô carnéfici, ma o saiæ a ciù vergognôza omisción de soccórso no preparâse a accêugge e agiûtâ e figge che a rìschio da vìtta pròpia e de quella di lô câi - che no de râo son tegnûi in ostàggio inti lô paéizi d'orìgine - ozéssan tentâ a fûga da-o lô inferno. Créddo che quarche ténpo fa l'Amministraçión a l'agge anunçiòu a costituçión de 'n osservatòrio in sce sto problêma. Spêro ch'a l'agge fæto. Ma osservâ o no basta ciù! Se osserva 'n panoràma, de frónte a 'n dràmma se intervegne! Sénsa che mì vêugge mancâ de rispètto a nisciun, ammonìscio che l'osservaçión do problêma no seguîa da iniziatîve concrête a rischiâva de degenerâ inte 'n fàtuo e stêrile voyeurìsmo. No créddo a segge questa a voluntæ da giùnta, e me son conçèsso a frâze precedénte pe imprìmme in mòddo quànto ciù indelébile in tùtti niâtri l'urgénsa de 'na svòrta concrêta e tangìbile inte l'inpegno de niâtri tùtti pe-a lòtta a-a sciâvitù inta nòstra çittæ e into nòstro paéize. Comme dîto, émmo pöchi struménti. Ma Davide o l'à abatûo Golia con 'na frónda.
L'informaçión a l'é o nòstro mêgio vacìn. Dovémmo informâ e çentenâ ò e mijæ de figge che inta nòstra çittæ vîvan in regìmme de sciâvitù, de tùtti i lô dirìtti e oportunitæ. E sciâve son in génere indottrinæ a teme e fòrse de l'òrdine e e istituçioìn italiànne ascì ciù di lô carcerê. Sta mezéugna a va fugâ. Esòrto l'Amministraçión çitadìnn-a a stanpâ periòdicamente opùscoli redàtti inte-e léngue generalménte capîe da-e figge deportæ inta nòstra çittæ, inti quæ sìggian ciaraménte illustræ i lô dirìtti e e oportunitæ che o stâto italiàn e o nòstro Comûne offran a lô tutéla. Che se distribuìscian capillarménte sti opùscoli tra e prostitûte che de séia afòllan i marciapê e inti âtri ambiénti donde se sospètte che e figge-sciâve pòssan èse tegnûe ascôze. Che se repétan e mæxime informaçioìn in sce manifèsti afìssi in tùtta a çittæ. Che se avvîe 'na campagna de sensibilizaçión, dirètta a tùtti i nòstri conçitadìn, in sce-e esatte caratterìstiche de sto infàmme stâto de-e cöse. O figgeu che de séia alegraménte o se càrega 'na bèlla figgia foestê in màchina pe divertîse 'n pò, fórse o ghe pensiâ dôe vòtte savéndo ch'o l'é o seu gèsto, sommòu a quello di âtri, a alimentâ 'n mercòu de-e sciâve che sénsa domànda o no ghe saiæ. O ghe pensiâ dôe vòtte e pöi magâri o-o faiâ o mæximo, ma intànto o gh'aviâ pensòu dôe vòtte, e âtre dôe o ghe pensiâ a vòtta dòppo. A fòrsa de pensâ, primma ò pöi, o ghe poriæ ascì vegnî in mente quarcösa de neuvo. O ghe poriæ vegnî in mente, vâle a dî, che o piaxéi da seu trasgresción o l'é d'un tràtto inferiô a-o fastìdio de savéise eleménto cauzâle e uténte de 'na tràtta de-e sciâve, e allóa, e sólo allóa, magâri o renonçiâ a-o seu sfìçio.
Informâ, informâ, informâ! Informâ e sciâve de-e oportunitæ che a lô se offran, informâ i çitadìn do crìmine a cui lô partécipan adêuviàndo e sciâve, informâ e nòstre ciù âte cârreghe do Stâto da necessitæ d'urgénti intervénti legislatîvi e organizatîvi in própòxito e da nòstra pìnn-a disponibilitæ e voluntæ d'operâ sùbito. Informâ i ciù âti organìsmi internaçionâli de-e nòstre risoluçioìn, e esortâli a attivâse in sce sti argoménti. Contatâ tùtti i âtri Cap'di-lêugo italiàn pe informâli de-e nòstre decixoìn e stabilî vìncoli de cooperaçión. Informâ, ecco a primma cösa da fâ. Seguan e âtre. Spêro se fàssan. Se i italiàn no saviàn superâ l'atuâle infàmia de sta perduànte deportaçión de massa de mijæ de figge in sciâvitù, levæ a-e lô nòrme e a-e lô famìggie lontàne pe èse redûte in coàtta cärne da sèsso in sci-i marciapê italiàn, pe l'inconsciénte sodisfaçión sessuâle de tànti brâvi italiàn, ghe saiâ davéi, ma dìggo davéi, da vergognâse d'èse italiàn.
Anni fa, lezénde metropolitàne evocâvan o spèttro de 'na tràtta de-e gianche, rattæ inti nòstri paéizi e vendûe a scûri sceìcchi beduìn de paéizi lontàn, inti quæ harem lô pe sénpre saiéivan restæ reclûze. Probabilménte ste lezénde i avéivan do vêo. Nisciùnn-a persónn-a ch'a segge mâi stæta inte sti fantomàtichi harem a l'é mâi tornâ inderê a contâlo. Comme se sentiæ ognidun de niâtri se a pròpia figgia a vegnìsse rattâ e condanâ a sodisfâ pe tùtta a vìtta e vêugge de quarche mîzero sultàn da pròpia òazi in mèzo a 'n dezèrto dscordòu? Questo pe fortùnn-a mâi ò quæxi o sucède. Seguo invéce o l'é che ancheu o capita l'incontrâio. Sémmo niâtri italiàn, pe quarche genitô lontàn e pe-a spaurîa mente de-e figgétte deportæ da niâtri, i immóndi sultàn che con disprêxo de tùtto fan i pròpi bezéugni donde, mascìmo e apparénse postìççe, o no l'é pe ninte domandòu che sti bezéugni se fàssan. Pigémmone atto, e agémmo de conseguénsa in tùtti i mòddi poscìbili.
Roberto Quaglia
Ill.mo Sìndaco
do Comûne de Zêna
Órdine do Giórno
i n s c i ô e m e r g é n t e 
p r o b l ê m a d a s c i â v i t ù
a f ì n d e p r o s t i t u ç i ó n
a Z ê n a c o m m e i n t e - e â t r e ç i t t æ i t a l i à n n e
O Conseggio Comunâle de Zêna
Contemplòu che
inta Convençión supplementâre relatîva a l'aboliçión da sciâvitù, da tràtta di sciâvi e de-e istituçioìn e pràtiche anàloghe a-a sciâvitù, firmâ a Ginevra o 7 de setténbre do 1956, se lêze tra l'âtro:
- PREMÉSSA:
- Conscideròu che a libertæ a l'é 'n dirìtto che tùtti i èse umàn acquìstan a-a nàscita;
- Cosciénti de quello che o pòpolo de-e Naçioìn Unîe o l'à confermòu inta Carta, a lô féde inta dignitæ e o valô de l'èse umàn;
- Conscideràndo che a Dichiaraçión universâle di dirìtti de l'òmmo, che l'Assemblêa generâle a l'à proclamòu comme ideâle comûne da raggìonze pe tùtti i pòpoli e a tùtte e Naçioìn, a dispón che nisciun o saiâ tegnûo in sciâvitù e che a sciâvitù e a tràtta di sciâvi son abolîe in tùtte e lô fórme;
- Riconoscèndo che, dòppo a concluxón, a Ginevra, o 25 de setténbre do 1926, da Convençión relatîva a-a sciâvitù, ch'a mîa a soprìmme a sciâvitù e a tràtta di sciâvi, son stæti fæti neuvi progrèssi inte sta direçión;
- Tegnindo cónto da Convençión do 1930 in sciô travàggio forsòu e de quello ch'o l'é stæto fæto apprèsso da l'Organizzazione Internazionale del Lavoro e de quello ch'o concèrne o travàggio forsòu obligatòrio;
- Constatòu tuttavîa che a sciâvitù, a tràtta di sciâvi e e istituçioìn e pràtiche anàloghe a-a sciâvitù no son stæte ancón eliminæ in tùtte e region do mondo;
- Avéndo decîzo in conseguénsa a-a Convençión do 1926, ch'a l'é sénpre in vigô, de vâlise de 'na Convençión supplementâre destinâ a intensificâ i sfòrsi, tànto naçionâli che internaçionâli che mîan a abolî a sciâvitù, a tràtta di sciâvi e e istituçioìn e pràtiche anàloghe a-a sciâvitù;
- SEÇIÓN PRIMMA
- Artìcolo primmo.
Ciascun Stâto partecipànte a-a prezénte Convençión o piggiâ tùtte e mizûe, legislatîve e âtre, ch'e saiàn realizàbili e necessâie pe otegnî progressivaménte e o ciù prèsto poscìbile l'aboliçión conpléta de-e istituçioìn e pràtiche seguénti, là donde quéste existan ancón, vâle a dî quelle ch'intran ò nò inta definiçión de sciâvitù ch'a cónpâ into 1° art. da Convençión relatîva a-a sciâvitù firmâ a Ginevra o 25/9/1926;
- a) a sciâvitù pe debiti ò sa a condiçión ch'a resulta da-o fæto che 'n debitô o l'é inpegnòu a fornî, comme garanzìa de 'n débito, i seu servìçi personâli ò quelli de quarchedun in sciô quæ o l'à autoritæ; se o valô de sti servìçi o no l'é destinòu a-a liquidaçión do débito ò se a dûâ de sti servìçi a no l'é limitâ, né o lô carattere definîo, gh'é a sciâvitù pe debiti;
- b) a sciâvitù, vâle a dî a condiçión de chiunque o l'é tegnûo pe lézze, abitùdine ò acòrdio, a vîve e a travagiâ in sce 'na tæra appartegnénte a 'n'âtra persónn-a e a fornî a sta âtra persónn-a, in cànbio de cónpenso ò gratuitaménte, quarche servìçio determinòu, sénsa podéi cangiâ sta condiçión;
- c) Tùtte e istituçioìn ò sa pràtiche in virtù de-e quæ:
- I) 'na dònna, sénsa ch'a l'agge o dirìtto de refuâse, a l'é promìssa spôza in cànbio de 'na
- contropàrte in dené ò in natûa versæ a-i seu genitoî, a-o seu tutô, a-a seu famìggia ò a âtre persónn-e ò grùppi de persónn-e;
- II) o maîo de 'na dònna, a famìggia ò âtri an o dirìtto de çêde a dònna a 'n tèrso, a tìtolo onerôzo ò in âtro mòddo;
- III) a dònna a pêu, dòppo a mòrte de seu maîo èse ereditâ da 'n'âtra persónn-a;
- d) ògni istituçión ò pràtica in virtù da quæ 'n figgeu ò 'n adolescénte de meno de 18 anni o l'é afidòu, scìa da-i seu genitoî, ò da un de lô, scìa da-o seu tutô, a 'n tèrso, con pagaménto ò nò "a-a conségna", in vista do sfrutaménto do travàggio convegnûo do figgeu ò de l'adolescénte.
- SEÇIÓN II (Tràtta di sciâvi)
- Artìcolo 3
- O fæto de trasportâ ò de tentâ de trasportâ di sciâvi da 'n paéize a 'n âtro con 'n mèzo de traspòrto quæsìasi ò o fæto d'èse cómplice de ste ativitæ, o costituiâ 'n'infraçión penâle inti confrónti da lézze di Stâti Partecipànti a-a Convençión e e persónn-e riconosciûe corpévoli de 'na tâle infraçión saiàn passìbili de pénn-e mòlto rigorôze.
- a) I Stâti partecipànti piggiàn tùtte e mizûe eficâci pe impedî a-e nâvi e a-i aerèi autorizæ a percórre o lô teritòrio, de trasportâ i sciâvi e piggiàn tùtte e mizûe eficâci pe punî e persónn-e corpévoli de sti atti ò corpévoli d'adêuviâ o teritòrio naçionâle a sto fìn;
- b) I Stâti partecipànti piggiàn tùtte e mizûe eficâci açochè i lô pòrti, i lô aeropòrti e e lô cöste no pòssan servî a-o traspòrto di sciâvi.
- I Stâti partecipànti a-a Convençión se scangiàn informaçioìn a-o fìn d'assegurâ o coordinaménto pràtico de-e mizûe pîge da lô inta lòtta contra a tràtta di sciâvi e se informiàn reciprocaménte de tùtti i câxi de tràtta di sciâvi e de tùtti i tentatîvi d'infraçión de sto génere di quæ saiàn a conoscénsa.
- Artìcolo 4
Tùtti i sciâvi che se refûgian a bòrdo de 'na nâve de 'n Stâto partecipànte a-a prezénte Convençión saiàn lìberi "ipso fatto". - SEÇIÓN IV (Definiçioìn)
- Artìcolo 7
A-o fìn da prezénte Convençión:
- a) A sciâvitù, coscì comm'a l'é definîa inta Convençión do 1926 a l'é o stâto ò a condiçión de 'n indivìdoo in sciô quæ se exèrcita l'atribuçión do dirìtto de propietæ e o sciâvo o l'é l'indivìdoo ch'o l'é inte sta condiçión.
- b) A persónn-a "in condiçión de sciâvitù" a l'é quella ch'a l'é indicâ into Statûto, ò sa inta condiçión ch'a resulta da ûnn-a de-e istituçioìn ò pràtiche vìste inte l'artìcolo primmo da prezénte Convençión.
- c) A "tràtta di sciâvi" a stabilìsce e a conprénde tùtti i atti de cattûa, d'acquìsto ò de cescion de 'na persónn-a pe redûe a mæxima in sciâvitù, tùtti i atti d'acquìsto de 'n sciâvo in vista de véndilo ò de scangiâlo, coscì comme in generâle tùtti i atti de comèrcio e traspòrto di sciâvi e quelli ch'én i mèzi de traspòrto adêuviæ.
- SEÇIÓN V (Cooperaçión tra i Stâti Partecipànti e comunicaçión d'informaçioìn)
- Artìcolo 8
- I Stâti Partecipànti a-a Convençión se son inpegnæ a vicénda a ofrî 'n mûtuo concórso e a cooperâ con l'Organizzazione delle Nazioni Unite in vista de-e disposiçioìn elencæ precedenteménte.
- I Stâti Partecipànti a-a Convençión se inpegniàn a comunicâ a-o Segretâio Generâle de-e Naçioìn Unîe còpia de tùtte e léggi, tùtti i regolaménti e tùtte e decixoìn amministratîve adottæ ò mìsse in vigô pe dâ efètto a-e disposiçioìn da prezénte Convençión.
- O Segretâio Generâle o comunichiâ e informaçioìn acquistæ, in virtù do paragrafo segóndo do prezénte artìcolo 8, a-i Stâti Partecipànti e a-o Conseggio econòmico e soçiâle, o quæ o adotiâ ste discuscioìn comme documentaçión in sce cui discôre e o procederâ a pónne neuve racomandaçioìn in sce l'aboliçión da sciâvitù, da tràtta di sciâvi ò de-e istituçioìn e pràtiche ch'én l'oggétto da Convençión.
- SEÇIÓN VI (Clàuzole finâli)
- Artìcolo 9
No saiâ amìssa nisciùnn-a riserva a-a Convençión. - Artìcolo 15
- A prezénte Convençión a cui i tèsti ingléixi, chinéixi, spagnòli, françéixi e rùssi faiàn legalménte féde, a saiâ depoxitâ inti archîvi do Segretâio de-e Naçioìn Unîe. O Segretâio Generâle o ne stabiliâ de-e còpie çertificæ adeguæ a informâ i Stâti Partecipànti a-a Convençión coscì comme tùtti i âtri Stâti Mémbri de-e Naçioìn Unîe e e Istituçioìn speçializæ.
- In féde de questo i sottoscrîti debitaménte autorizæ da-i lô rispettîvi Govèrni, an firmòu a prezénte Convençión a-a dâta ch'a l'é rapprezentâ da-e lô rispettîve firme.
- Firmòu a l'Ufìçio Europêo de-e Naçioìn Unîe, a Ginevra, o 7 de setténbre do 1956.
apuròu che
- Into tèsto da senténsa da Corte Costituzionale 8 de Zùgno do 1981 n.96 treuvémmo che...
"A noçión de sciâvitù ò condiçión anàloga a-a sciâvitù intéiza comme condiçión de dirìtto contemplâ inti artìcoli 600-602 do còdice ... a no tegnîva cónto de l'art. 1 da Convençión de Ginevra 25 de setténbre do 1926 divegnûa lézze intèrna italiànn-a con r.d. 26 d'arvî do 1928 n. 1723... e rinovâ inta Convençión de Ginevra 7 de Novénbre do 1957 aprovâ con lézze 20 de dixénbre do 1957 n. 1304. Inte l'elénco de-e diverse situaçioìn che a Convençión a consìdera istituçioìn e pràtiche anàloghe a-a sciâvitù diverse de lô son situaçioìn de fæto e no de dirìtto perché realizàbili sénsa che nisciun atto ò fæto normatîvo o-e autorize." - E into tèsto da senténsa da Corte d'Assise de Firenze, 23 de Mârso do 1993, treuvémmo che...
"a sciâvitù e a condiçión anàloga dêvan èse ritegnûi eleménti normatîvi da fattispêce, a cui valutaçión a pêu èse comunemente cónpîa ò a-a strêgua de 'na nòrma giurìdica ch'a qualìfiche - positivaménte ò negativaménte - 'na speçìfica situaçión de fæto comme sciâvitù ò condiçión anàloga, ò sa in aplicaçión de paràmetri stòrico-soçiâli, che conséntan a repressión de fenòmeni caratterizæ da-i mæximi aspètti d'oféiza da personalitæ individuâle connotànti e figûe de sciâvitù storicaménte nòte." - E che segóndo Cassazione penale sez. V, 7 de Dixénbre do 1989 in Dir. famiglia 1990, 1095...
"Chiunque o redûe in condiçión anàloga a-a sciâvitù 'na persónn-a (de pù s'a l'é minô de etæ) ò o l'acquìste 'na persónn-a ch'a se trêuva inta condiçión predîta, o no pêu invocâ l'inevitàbile ignorànsa da lézze penâle: se tràtta in veitæ de nòrme confórmi a-o prinçìpio de riconoscibilitæ, vâle a dî tâli da èse percepîe ascì comme nòrme extrapenâli de civiltæ, sénsa dúbbio vigénti inte l'ambiénte socioculturâle in seno a-o quæ e nòrme mæxime òperan."
pigiòu atto che
a CARITAS ITALIANA, insémme a MIGRANTES, USMI, UISG, ASPE, a l'à realizòu o 6-7 de Dixénbre do 1996 a Roma 'n seminâio de stûdio in sciô téma "Tràtta di èse umàn a scòpo de sfrutaménto sessuâle", da-i atti do quæ son tîræ i seguénti dæti e argomentaçioìn:
- A-a vigìlia do 2000 ne ritrovémmo a osservâ 'n fenòmeno che credéivimo sparîo pe sénpre: a sciâvitù. Ancheu a dònna e o minô immigròu vegnan redûti in sciâvitù, pe podéi èse oggétto de piaxéi, sfrutæ sessualménte.
Sto fenòmeno, da niâtri analizòu, o coinvòlze mijæ de dònne immigræ, illûze, ingannæ e pöi prostituîe, costréite, vâle a dî, co-a fòrsa a prostituîse, da organizaçioìn criminâli italiànne e foestê ch'an inventòu ògni fórma de ricàtto, ascì afettîvo, pur de otegnî fàçili guägni e ofrî "mèrce umàna" da consumâ sessualménte.(Caritas Italiana, Migrantes, Usmi, Uisg, Aspe)
- "A TRÀTTA DE-E DÒNNE A L'É CIÙ REDDITÌÇIA DO TRÀFEGO DE-E ÂRME E DA DREUGA": sta dichiaraçión fæta into 1983 da Jean Fernand Laurent, rapporteur a-e Naçioìn Unîe pe sta problemàtica, a no l'à pèrso a seu atualitæ e a mette in lûxe ascì a corelaçión ch'a gh'é tra i fenòmeni citæ. A ne fa sùbito cosciénti da duréssa e complescitæ de questo ch'o l'é o motîvo do nòstro convegnî d'ancheu: a tràtta de èse umàn, in speçìfico dònne, a scòpo d'abûzo sessuâle.
(Pino Gulia, Caritas Italiana)
- TRÀTTI DESCRITTÎVI DO FENÒMENO
- L'aspètto quantitatîvo... E stìmme naçionâli prezentæ da-o PARSEC (Associaçión ricèrca e intervénto soçiâle in colaboraçión con l'Univerxitæ de Firenze) confèrman 'na prezénsa ch'a osçilla tra e 19.000 e e 26.000 unitæ; ma a çifra a poriæ èse mòlto superiô se se consìderan tùtte e dònne fæte transitâ pe l'Italia e destinæ a âtri paéizi europêi.
- Flùssi e provegnénse....
- Ascì se con diverse stratêgie e con diversci livèlli de coinvolgiménto e consapevoléssa da pàrte de-e dònne, o tràtto comûne e distintîvo de sto fenòmeno o l'é l'imposcibilitæ pe-e vìttime d'intervegnî liberaménte inta gestión do pròpio progètto migratòrio, dónca, a reâle condiçión de sciâvitù a cui son costréite.
- Tra o 1989 e o 1991: in concomitànsa con quarche eventâle ch'o coinvòlze l'Európa e co-a promulgaçión da lézze 39/1990 i flùssi se increméntan notevolménte, con arîvi significatîvi ascì da l'Európa de l'Èst. Da-o pùnto de vista giurìdico i arîvi son prevalenteménte clandestìn, spésso gestîi e coordinæ da vêe e pròpie agenzìe de trafegànti, scìa italiàn che foestê.
- Tra o 1992 e o 1994: se caratterìzan pe arîvi ciù consisténti di precedénti, prinçipalménte da l'Albania e da-a Nigeria. Relativaménte a-i arîvi da l'Albania se tràtta de figge mòlto zoêne, prevalenteménte nùbili, de provegnénsa urbàna, adescæ da connaçionâli pòco ciù vêgi de lô che, fingéndose innamoræ e co-a proméssa de 'n imminénte matrimònio in Italia, e convìnsan a espatriâ e, inte 'n segóndo moménto, e costrénzan a prostituîse. E dònne nigeriànne son mediaménte meno zoêne de-e albanéixi, nùbili, de provegnénsa urbàna, spésso con esperiénse profescionâli de tùtt'âtro génere. E nigeriànne vegnan adescæ da connaçionâli ch'antìcipan o dené necessâio pe-i documénti e o viàggio: sto débito iniziâle o divénta un di vìncoli maggioî pe-a sciortîa da-o tràfego (atualménte a çifra a se agiriæ in gîo a-i sciuscentamîla mîla lîre). Pe finî, consisténti ascì i arîvi da l'Èst Europêo de figge inpegnæ into travàggio de strâda e, se ipotiza, drénto a locâli notùrni e céntri estêtichi.
- Atualménte: predòminan ancón a prezénsa albanéize e nigeriànn-a. E caratterìstiche sòcio-demogràfiche de-e dònne, e ascì e testimoniànse di operatoî, confèrman 'na maggiô informaçión in sce l'ativitæ da fâ in Italia, tuttavîa 'na maggiô consapevoléssa a no e tutéla da-i tràumi successîvi e continui a cui son sottopòste pe-e condiçioìn de sciâvitù in cui vîvan. I arîvi ciù recénti son caratterizæ da figge con provegnénsa da-i vilàggi intèrni di paéizi e 'n'etæ sénpre ciù zoêna, de pù pe-e albanéixi.
- Ipòtexi d'intervénto...
(...) se ritén oportûno consciderâ i seguénti presuppòsti (...):- Che o fenòmeno o l'à rilevànsa locâle e pe questo o l'à de bezéugno de 'na réte de travàggio e sostégno ch'a intervegne sùbito, concretaménte, a favô de-e vìttime.
- Che o fenòmeno o l'à rilevànsa naçionâle e internaçionâle e che pe questo o l'à de bezéugno de 'n dibàttito polìtico vivâxe e aténto.
- Che i soggètti a cui indirizâ l'intervénto son da 'n lâto e dònne, a cui o l'é dovûo 'na rispòsta immediâta e concrêta e a soçietæ into seu insémme, a cui indirizâ 'n'informaçión responsàbile e no scandalìstica in sciô téma e 'n travàggio de sensibilizaçión a mêdio e lóngo tèrmine, da l'âtro lâto i cliénti.
- Intervénto operatîvo in sce-e vìttime: aproccio, acoglénsa, orientaménto, assisténsa psicològica e legâle, acompagnaménto inte 'n percórso d'autonomîa inte 'n'òttica de coordinaménto e de travàggio de réte tra e diverse risórse do teritòrio.
(Maurizio Ambrosini, Università Cattolica)
- Progètti personalizæ e realizæ in sciâ bâze de-e reâli exigénse de-e persónn-e (ascôlto, acoglénsa, ricostruçión da personalitæ, riconciliaçión con lê mæxima e co-i âtri...)
- Itinerâri con obiettîvi e fâzi.
- Tutéla giurìdica (regolarizaçión, denóncia, assisténsa giurìdica...)
- Pìccole fórme d'acoglénsa, in comunitæ ò famìggie.
- Poscibilitæ de trasferiménti pe seguéssa.
- Reinseriménto soçiâle, scolàstico, lavoratîvo.
- Poscibilitæ de ritórno in pàtria, con opportûne garanzìe, pe chi o-o dexìdera.
- Colegaménto con Ambasciæ e Consolæ italiàn inti paéizi d'orìgine (vìsti) e de-e Ambasciæ di paéizi d'orìgine in Italia (apòggio, documénti, rientri.....)
(Maria Teresa Tavassi, Caritas Italiana)
- A TRÀTTA DE-E DÒNNE FOESTÊ IMMIGRÆ IN ITALIA
... pe-a quæxi totalitæ di neuvi soggètti che se véndan in strâda, e prostitûte immigræ, questo o l'é 'n travàggio sciâvo: son portæ da-a tràtta di èse umàn a scòpo d'abûzo sessuâle. A ricèrca fæta da-o Parsec e da-a Univerxitæ de Firenze inte l'arvî do 1996 pe-a conferénsa de Vienna a stìmma o lô numero - a dî de testimòni privilegiæ - tra e 18.800 e e 25.100. Se tràtta de dæti aprossimatîvi ch'avéivan de bezéugno de maggioî confèrme, ma globalménte ne dàn e dimenscioìn.
(Don Fredo Olivero, Caritas diocesana di Torino)
- Analixi da situaçión
- Drénto a-o ciù vasto panoràma da prostituçión, o l'é sénpre ciù in espansción in tùtta l'Európa o fenòmeno do "tràfego de dònne" fæte arivâ da organizaçioìn criminâli da-i paéizi in vîa de sviluppo e da l'Európa céntro-orientâle e apprèsso forsæ co-a violénsa a prostituîse.
- A "Conferénsa de Vienna in sciâ tràtta de-e persónn-e" do 10-11 de zùgno do 1996 e o "Congrèsso mondiâle contra o sfrutaménto sessuâle di minoî" an evidençiòu con fòrsa:
- a vastitæ do fenòmeno
- a necessitæ de 'na lòtta congìonta di diversci paéizi pe contrastâlo
- l'importànsa d'operâ a fiànco de-e vìttime.
- O reclutaménto de-e dònne, ch'én sénpre ciù zoêne, o segue diversci canâli:
- anùnci in sci-i giornâli da pàrte d'agenzìe ch'offran travàggio
- offèrte de travàggio e de gràndi guägni da pàrte de conoscénti comûni a-i sfruttatoî e a-e vìttime
- coinvolgiménto de-e famìggie d'orìgine (ch'o pêu arivâ fìnn-a a-a vêa e pròpia véndita da figgia) che spêran coscì de rezòlve i lô grâvi problêmi econòmichi
- coinvolgiménto sentimentâle de-e figge da pàrte de fìnti "morôxi" che arivæ in Italia òbligan a-a prostituçión
- rattaménto
- Arivæ a destinaçión, e dònne vegnan "istruîe" co-a violénsa fìnn-a a quàndo no la fenìscian de ribellâse, privæ di passapòrti, quarche vòtta rifornîe de documénti fâsci, costréite a rìtmi massacrànti e a conségnâ gran pàrte di guägni a-i protettoî, òbligæ a aceitâ quæsìasi prestaçión, vincolæ da enòrmi debiti, vendûe da 'na banda a l'âtra, ricattæ co-a minàccia de rivelâ a natûa da lô ativitæ a-i parénti restæ into paéize d'orìgine ò de ritorsioìn dirètte in sce de lô e e lô famìggie in câxo de ribellión, costréite a prostituîse ascì duànte 'na eventuâle gravidànsa ò a abortî ripetutaménte.
- Ascì quàndo e dònne pàrtan da-i lô paéizi consapévoli ch'andiàn a fâ 'n'ativitæ relatîva a-a prostituçión, illudéndose de podéi contrattâ e gestî a pròpia ativitæ, dificilménte imàginan e condiçioìn de vêa e pròpia sciâvitù in cui pöi se treuviàn e i ostàcoli ch'i doviàn affrontâ pe podéi interrónpe o rappòrto co-i sfruttatoî.
- O fæto d'èse clandestìnn-e e convìnse in ciù d'èse prîve d'ògni dirìtto de tutéla, e a poîa de denonçiâ i pròpi sfruttatoî a l'é alimentâ da-a consapevoléssa do rìschio de restâ sôle e espòste a ògni ritorsión, a-o mascimo espùlse e rimpatriæ.
- Inte sto contèsto e pöche figge che riescian a fuzî ò a domandâ agiùtto denonçiàndo i protettoî, ò ch'én individuæ da-a polizìa in condiçión de sciâvitù, dêvan immediataménte affrontâ i problêmi relatîvi a-o pròpio sostentaménto sénsa suppòrti psicològichi, legâli e materiâli che ghe conséntan de gestî a neuva condiçión.
(Paola Vitiello Caritas docesiana di Bologna)
- A tràtta de-e dònne africànne (Nigeria, Ghana)
- L'immigraçión organizâ e massìccia in Italia de dònne africànne de l'ârea sub sahariànn-a (Nigeria in particolâre, Ghana con passapòrto nigeriàn...) cominçòu a fìn de l'88, a l'à avûo 'n fòrte increménto inte l'89-'90 (de pù inti ùrtimi méixi quàndo o l'êa in discusción a lézze Martelli), a l'é continuâ in mizûa minô into '91 fìnn-a a ancheu.
- In Italia, segóndo dæti racòrti inte-e çittæ cap'do-lêugo de provìncia into 1989, son armeno 6000 e dònne nigeriànne arivæ con vìsto de l'Ambasciâ italiànn-a in Nigeria (Lagos) che fan o travàggio de prostitûta in strâda.
- Inta sôla provìncia de Torino son otre 600 quelle che vîvan e rapprezéntan a quæxi totalitæ de-e dònne nigeriànne prezénti in sciô teritòrio, e exèrcitan a prostituçión de strâda in tùtta a region.
- Provégnan tùtte da-e mæxime ârie do sùd da Nigeria, da-e çittæ de Benin City, Lagos ò da quarche çitadìnn-a de l'intèrno e apparténgan a-e tribù Ibo, Yoruba, Benin, Edo.
- Comme arîvan in Italia
Ve riportémmo i dæti de-e testimoniànse de çentenâ de figge, confermæ da prêuve e riscóntri oggettîvi.
- L'arîvo - pe quæxi tùtte, fìnn-a a-o 1991 - o l'é l'aeropòrto de Roma e ùrtimaménte Linate e Malpensa, e a parténsa - pe tùtte - a l'é l'aeropòrto de Lagos (Nigeria), con vìsto de trànsito da 3 a 15 giórni rilasciòu da l'ambasciâ italiànn-a de Lagos, otegnûo a tràverso quarchedun che "o l'à pigiòu a chêu" a lô pràtica, pagàndo l'equivalénte de 4-5 milioìn de lîre normalménte a çitadìn nigeriàn che "an accèsso a-i ufìçi consolâri de l'Ambasciâ", con cui colàboran, e riescian a otegnîlo, opûre in agenzìe de cànbio ò de viàggi vixìn a l'ambasciâ.
- O passapòrto o vegne otegnûo dirèttamente da-a polizìa locâle ch'o-o prepâra e o-o vénde. Son passapòrti "regolâri", acquistæ a tràverso l'organizaçión criminâle. Questo o vâle ascì pe chi o l'é za in Italia: ghe saiâ mandòu pe pòsta, ò a tràverso 'n amîgo ò 'n parénte.
- Ghe son câxi de dònne ch'an avûo o mæximo giórno o refûo de vìsto e - dòppo pöche ôe - o vìsto pe-i bóni àuspici de sti scignoî e o versaménto da "tangénte" corispondénte. O vìsto de trànsito o prevederiæ 'n bigétto aerèo pe âtre localitæ ma inte sti câxi o no serve.
- Inte sti ùrtimi anni ('93-'96) stàn arivàndo ascì çitadìn do Benin e Ghanéixi, vîa Parigi ò vîa Bucarest, Sofia, Larmaca, Mosca, Amsterdam e Bruxelles. I grùppi ciù numerôxi de nigeriànne arivâvan a Roma con vìsto de trànsito ò vìsti d'intrâta collettîvi pe "pellegrinàggio religiôzo a lêughi sàcri diversci italiàn" (o numero de-e dònne registræ pe ògni vìsto o l'é d'incirca 15-20). Questo fìnn-a a-o 1993.
- Quæ soluçioìn pe-a prostituçión immigrâ soggètta a-a tràtta
- O va primma de tùtto analizòu a condiçión de vìtta. O problêma o va affrontòu in tèrmini corispondénti a-a realtæ: a prostituçión de dònne immigræ a no l'é prostituçión "pe sciêlta", ma pe costriçión; a l'é dónca tràtta de dònne e òmmi finalizâ a-o sfrutaménto sessuâle. Rilevànte e caratterizànte a l'é a condiçión de sciâvitù ò semisciâvitù in cui son redûte e no sólo o fæto de véndise in sciâ strâda ò in locâli serræ.
- Ancheu in Italia a l'é dominànte a prostituçión ch'a no nasce da-o disâxo de l'immigraçión ma da-o comèrcio internaçionâle. a tànte dònne ghe vegne levâ (co-a sottraçión di documénti personâli) a lô identitæ: ghe vegne levâ a poscibilitæ de documentâ chi son, da donde vegnan, quàndo e comme son intræ e o mæximo paéize e comunitæ de provegnénsa.
- Inta tràtta de pù de dònne africànne a l'é coinvòlta comme vìttima ascì a famìggia: gh'é a poscibilitæ de subî ricàtti, de violénse da pàrte da criminalitæ organizâ con fòrti connivénse inte-e istituçioìn locâli (de pù a polizìa).
- A lô sciortîa "da-a strâda" a comporta ascì pe lô rìschi de subî violénse da l'organizaçión, ch'a de sòlito a òpera dirèttamente a tràverso colettoî-controlloî ("maman", "figgeu", "conpaezàn-sfruttatô"). O no l'é râo o câxo de sfrêxi, cotelæ, violénse sessuâli de grùppo e quarche vòtta l'uccixón de chi o sfûze a-e régole e o invîta âtre a fâ a mæxima strâda.
- L'esperiénsa de prostituçión a lascia 'n segno profóndo in sciâ vìtta da persónn-a.
- Gh'é dónca o camìn de recùpero, de ripréiza da lô dignitæ de dònne che tórnan a rivîve sénsa véndilo i lô còrpi. Questo o l'à de bezéugno (otre a-a sciortîa da-o mondo do sèsso conpròu) de 'n ténpo de pàuza, de riflesción e 'n'esperiénsa de vìtta personâle e soçiâle positîva, poscìbilmente inserîa into mondo do travàggio.
- O "travàggio in strâda" o lascia ascì segni fìxichi: i rìschi pe-a salûte son grandìscimi e quarche vòtta i sìntomi se fan sentî dòppo tànti méixi (AIDS in particolâre).
- A prostituçión a l'Èst : a primma rispòsta a-a tràtta de-e Albanéixi (1995-96)
- A quæxi totalitæ da prostituçión albanéize a l'é coàtta, ascì se a convìnsile a partî son stæte a mizêria, a mancànsa de travàggio, a distruçión do tesciûo soçiâle, a mancànsa de prospettîve. E pöi perché 'na figgia "ciaciarâ" ò de strâda a no pêu rientrâ a câ: a tradiçión, a psicologîa, o senso de l'onô o-o proìbiscian: a l'é 'na vergógna.
- A prostituçión vêa a no l'é aceitâ da-a cultûa albanéize (e a no existîva se no coèrta in quarche locâle da ballo gestîi da-a minorànsa egiçiàn-albanéize).
- Segóndo e léggi medioevâli de Lec Ducayni - aceitæ ancón da-a tradiçión de pù contadìnn-a e montanâa - "'na figgia ciaciarâ a se poéiva sposâ sólo co-o proiettìle inta seu dòte de spôza e a poéiva èse uccîza in ògni ocaxón da-o maîo, suêgro cugnòu ò da-o figgeu perché a balòtta a l'êa stæta pagâ da-a seu famìggia. Inte ste ocaxoìn o poæ, pigiàndo o cadàvere da figgia, o dovéiva dî: "Beòu o teu sciòppo, o padrón de câ!"" (da 'na testimoniànsa albanéize). A tràtta a scòpo d'abûzo sessuâle a riguârda ascì quarche minô màscio a Torino e o fenòmeno o no l'é evidénte.
- O govèrno albanéize "convìnto" da-i investiménti che vegnan fæti into Paéize co-i guägni da criminalitæ organizâ, o fìnze de no védde; a polizìa albanéize a lùcra dirèttamente in sci-i documénti e in sciâ facilitaçión di passàggi. Dónca o dêve èsighe 'n rappòrto sêrio tra govèrni pe pónne fìn - a-o de çà e a-o de là - a-o crìmine organizòu, sénsa mèzi tèrmini e con pool de fòrse de l'òrdine adeguæ e segui.
- A costruçión de prospettîve pe tùtte e vìttime da tràtta
- Riconósce sta prioritæ: pónne fìn a-a tràtta de-e "sciâve" e di "sciâvi".
- Travagiâ pe fâ informaçión chì e into paéize de provegnénsa in sciâ portâ e a realtæ do fenòmeno.
- Inpegnâse inte l'acoglénsa, into dâ segni diversci e contrâri (gratuitæ, afètto...) a-o comèrcio do lô còrpo.
(Don Fredo Olivero, Caritas diocesana di Torino)
- Analixi da situaçión
- E INIZIATÎVE INTERNAÇIONÂLI INTE L'ÀMBITO DO TRÀFEGO DI ÈSE UMÀN
- Pöche fórme de criminalitæ son caratterizæ da 'na molteplicitæ d'interconnescioìn tra cian internaçionâle e, naçionâle e locâle comme o tràfego de èse umàn. O l'é pe seu natûa 'n fenòmeno internaçionâle, ma pe-i efètti ch'o determina o se pón a-o incróxo di rappòrti tra i stâti e e polìtiche naçionâli d'immigraçión e de cooperaçión a-o sviluppo. O tràfego de èse umàn o domanda pe questo 'n'açión coordinâ scìa a livèllo di Stâti che de-e relaçioìn internaçionâli. Ascì se no se pêu negâ che a legislaçión penâle a l'agge 'n fondaménto puraménte naçionâle, oramâi sémmo in prezénsa de situaçioìn criminâli tâli da domandâ che ascì a legislaçión naçionâle a dêbbe acquistâ 'na dimensción internaçionâle.
- E dificoltæ dimostræ da-i sìngoli Stâti inte l'affrontâ e controllâ a situaçión dimòstran l'importànsa de 'n aproccio internaçionâle inta lòtta contra o tràfego. Questo o pâ ancón ciù vêo pe l'Union Europêa che, a tràverso 'n aprofondiménto de l'integraçión into cànpo da giustìçia e di affâri intèrni, a poriæ dotâse de 'n struménto giurìdico comûne a tùtti i Stâti mémbri. Sólo l'adoçión de 'na polìtica d'armonizaçión de-e legislaçioìn naçionâli e 'na polìtica de cooperaçión polìtica e giudiziâria a poriâ ristabilî o rispètto de quelli dirìtti che ancheu son mìssi in perìcolo. L'Union Europêa a l'à cominçòu a dotâse de struménti giurìdichi e operatîvi che poriàn èse eficâci contra o tràfego de èse umàn. O sucèsso ò a sconfîta de sto tentatîvo saiàn l'espresción da capaçitæ de reaçión di govèrni democràtichi a-e sfîde pòste da-a criminalitæ organizâ.
- O Parlaménto Europêo "o intende pe tràtta de èse umàn l'atto ilegâle de chi, dirèttamente ò indirèttamente, o favorìsce l'intrâta ò o soggiórno de 'n çitadìn provegnénte da 'n Paéize tèrso a-i fìn do seu sfrutaménto adêuviàndo o ingànno ò quæsìasi âtra fórma de costriçión ò abuzàndo de 'na situaçión de vulnerabilitæ ò d'inçertéssa amministratîva" (art.1)
(Maria Paola Colombo Svevo, Deputòu a-o Parlaménto Europêo)
- CONCLUXOÌN OPERATÎVE
- No se pêu ignorâ e taxéi de frónte a 'n problêma ch'o nasce drénto a sto fenòmeno e ch'o coinvòlze 'n coscì âto numero de persónn-e.
- A tràtta de-e dònne immigræ a redûe a dònna inte 'n stâto de sfrutaménto e de sciâvitù: gh'é da difénde e restituî dignitæ de persónn-a umàna a ste dònne.
- Son dònne provegnénti da-i Paéizi ciù pövei de l'Èst europêo e do mondo.
- Tànte de ste persónn-e son minorénni.
- Tànte de lô dexìderan sciortî da-o gîo e çèrcan sostégno e protençión.
- Se existe l'offèrta o l'é segno ch'o gh'é domànda.
- Sta necessitæ a l'é ìndice do degrado morâle, soçiâle, civîle do nòstro Paéize, ascì se o problêma o se esténde a-o teritòrio europêo.
- Che se pénse seriaménte a-a poscibilitæ de 'na revixón legislatîva ch'a concêde o permésso de soggiórno a chi, minô ò adùlto, o decîde de sciortî "da-o gîo", scìa ch'i dàn 'n contribûto pe smascherâ e organizaçioìn criminâli ò nò.
(Elvio Damoli, Diretô Caritas Italiana)
- DICHIARAÇIÓN DO MINÌSTRO LIVIA TURCO
"Son sénpre ciù convìnta che o problêma ancheu o no segge inta prostituçión, ma 'n vêo e pròpio fenòmeno de tràtta. A stampa e i mèzi de comunicaçión soçiâle dêvan dâ 'na corrètta informaçión in sce sto fenòmeno. Ùrtimaménte, discorrèndo da "tràtta", con 'na giornalìsta za sensìbile, ho notòu che a mæ interlocutrîce a restâva 'n àtimo attònita pe-o tìpo de terminologîa adêuviòu da mì. Questo, dónca, o doviâ èse 'n primmo moménto de riscóntro pe 'n travàggio comûne: dâ 'na corrètta informaçión ch'a coinvòlze inta sensibilizaçión do fenòmeno e autoritæ làiche, polìtiche e religiôze. O nòstro o no dêve èse 'n travàggio a se stànte. O l'é necessâio costruî 'na réte, pe avéi di riferiménti a livèllo istituçionâle. O saiâ dónca giùsto o coinvolgiménto a livèllo locâle de-e Amministraçioìn, perché lô intervegnan e sostegnan e propòste e se fàssan cârego do problêma."
conscideròu che
- in sciâ bâze di dæti e di argoménti chì sciù espòsti, unîi a l'osservaçión de quànto o capita in orâio serâle in sci-i marciapê çitadìn, se ne dêve tirâ che çentenâ de figge inta nòstra çittæ (comme dêxine de mijæ into nòstro paéize) sùbiscian palezeménte e a tùtti i efètti ûnn-a de-e ciù infàmme e inaceitàbili violaçioìn di dirìtti umàn: a riduçión in sciâvitù
- i uténti finâli de sta colossâle tràtta de-e gianche e de-e néigre son çentenâ de mijæ de çitadìn màsci italiàn e, pe quànto o riguârda o nòstro Comûne, mijæ de çitadìn màsci zenéixi; o l'é pe-o vantàggio cärnâle de lô che o comèrcio de sciâve into nòstro paéize e inta nòstra çittæ o l'é nasciûo, o prospera e o se esténde;
- no se pêu dî civîle, inte l'açeçión iluminìstica do tèrmine, 'na comunitæ ch'a permétte e a s'avvantàggia da riduçión in sciâvitù de mijæ de zoêne figge; a sta inciviltæ se gìonze 'n'insopportàbile ipocrixîa quàndo pe conveniénsa (consciénte ò inconsciénte) se nêga che sta situaçión de fæto a susciste, ò se ne sminuìscian anpiéssa e rilevànsa, e a-o mæximo ténpo se dédichan existénti risórse e energîe a-a tutéla de 'na vasta gamma de dirìtti de minô prioritæ rispètto a quello fondamentâle dirìtto de libertæ e autodeterminaçión de l'indivìdoo che o regìmme de sciâvitù totalménte o l'abolìsce e o cancélla
- o problêma da sciâvitù a fìn prostitutîvi in Italia o l'é 'n fenòmeno ch'o se manifèsta de pù inte-e grànde ârie urbàne, donde l'uténsa a l'é maggiô; o l'é dónca necessâio che ògni Comûne, pur into necessâio coordinaménto co-e âtre istituçioìn, o se métte in gràdo de provvéde in pròpio a-a missa in òpera de stratêgie inteligénti atte a fronteggiâ degnaménte o fenòmeno
- a tràtta de-e sciâve a fìn prostitutîvi a l'é agevolâ da-a frequénte mancànsa d'informaçioìn, inti paéizi donde e figge vegnan reclutæ, in sce quànto lô saiàn costréite a fâ 'na vòtta in Italia
o inpegna o Sìndaco e a Giùnta
- a rapprezentâ a-o Prezidénte do Conseggio di Minìstri, a-o Minìstro de l'Intèrno, a-o Minìstro de l'Èstero, a-o Minìstro da Famìggia e Solidaritæ soçiâle, a-o Prezidénte da Càmera, a-o Prezidénte do Senòu e a-i Prezidénti de-e Commiscioìn Giustìçia e Affâri Soçiâli di doî râmi do Parlaménto l'interèsse do Conseggio Comunâle a che:
- o Parlaménto Italiàn o procêde a-o ciù prèsto co-e opportûne revixoìn legislatîve, finalizæ a-a efettîva tutéla di dirìtti umàn di indivìdoi che in Italia se trêuvan a vîve in regìmme de sciâvitù
- l'Italia a çèrche vìncoli continuatîvi de colaboraçión con tùtte e naçioìn inte-e quæ abitualménte vegnan reclutæ e figge da avviâ a-a prostituçión into nòstro paéize, finalizæ a-a produçión d'opportûne campagne d'informaçión da difónde inte-e dîte naçioìn a mèzo stampa e spot televixîvi, e inte-e quæ sìggian evidençiæ i rìschi che e figge córran a lasciâse condûe into nòstro Paéize sénsa ciù che debite garanzìe
- l'Italia a inóltre a-o Parlaménto Europêo a domànda formâle che sìggian mìsse a-o stûdio e dónca intraprêize da-a Comunitæ Europêa tùtte e iniziatîve opportûne atte a fronteggiâ e a contrastâ a tràtta de-e dònne in Európa
- l'Italia a inóltre a-l'O.N.U. l'interèsse do nòstro paéize a che:
- o téma da riduçión in sciâvitù e da tràtta de èse umàn into mondo o segge posto o ciù prèsto a l'órdine do giórno de 'na sedûta de l'O.N.U.
- o reâto de riduçión in sciâvitù o segge universalménte consideròu 'n vêo e pròpio crìmine contra l'Umanitæ
- o segge conseguenteménte istituîo 'n Tribunâle Internaçionâle pe-i crìmini da dîta tipologîa
- sìggian intraprêize fòrti açioìn inti confrónti de-e naçioìn che tròppo pòco se adêuvian pe contrastâ a riduçión in sciâvitù e a tràtta di èse umàn intra i confìn do pròpio teritòrio
- a promeuve a costituçión de 'na Consùlta di Sìndaci e de-e Amministraçioìn Locâli finalizâ a-a mûtua consultaçión e a 'n comûne coordinaménto pe-e diverse iniziatîve locâli atte a fronteggiâ o fenòmeno da sciâvitù
- a attivâse a-i fìn de creâ e rénde operatîvi céntri d'acoglénsa atti a ofrî confortévole e seguo refûgio a tùtte e figge in regìmme de sciâvitù che voléssan tentâ de sottrâse a-i lô padroìn
- a realizâ 'n opùscolo, tradûto inte-e léngue pròpie de-e prinçipâli naçionalitæ de-e figge foestê che se prostituìscian in Italia, into quæ o segge spiegòu, in mòddo esauriénte, sénplice e ciæo, tùtte e poscibilitæ, opçioìn e garanzìe che o Stâto Italiàn e o Comûne de Zêna offran a-e prostitûte e sciâve dexiderôze de cangiâ vìtta, e apprèsso provvéde a distribuî capillarménte sto opùscolo tra e prostitûte che càrcan i marciapê çitadìn
- a realizâ 'na sêrie de manifèsti, da affìggise in çittæ, i quæ provvédan:
- a sensibilizâ a popolaçión in sce l'existénsa in çittæ, comme in Italia, de 'na vêa e pròpia tràtta de-e sciâve, e che l'offèrta de sciâve a l'é alimentâ in primmo lêugo da-o fæto ch'o ghe n'é domànda
- a informâ inte-e lô prinçipâli léngue d'orìgine e prostitûte e e sciâve in sce-i lô dirìtti e e oportunitæ, fornèndo 'n numero vèrde pe ulteriôri informaçioìn
- a trasmétte còpia da prezénte moçión aprovâ a-l'ONU, contestualménte a 'na precîza e decîza domànda d'attivâse co-a mascima decixón
- a trasmétte còpia da prezénte moçión aprovâ a-i Sìndaci e a-i Prezidénti di Conseggi Comunâli de tùtti i cap'di-lêugo italiàn, insémme a-l'invîto a associâse e a colaborâ inta dîta Consùlta
- a trasmétte còpia da prezénte moçión aprovâ a tùtti i Parlamentâri italiàn, a-i Minìstri do Govèrno Italiàn, a-o Prezidénte da Càmera, a-o Prezidénte do Senòu e a-o Prezidénte da Repùbrica, insémme a 'na nòta de sensibilizaçión rispètto a-o problêma in oggétto
Proponénte: R.Quaglia
(Lista Pannella).
Èxito da votaçión
L'órdine do giórno o l'é stæto aprovòu con 30 vôti favorévoli e sètte contrâri (Lega). Da notâ o fæto che o Sìndaco Adriano Sansa, prezénte in âula, o no l'à votòu. O Cap'do-grùppo di popolâri, Giorgio Guerello, o l'é sciortîo da l'âula 'n àtimo primma da votaçión.
Rasségna de Stampa
L'ûnico artìcolo comparîo apprèsso a-i mæ sfòrsi o l'é stæto questo, de "LA STAMPA".
Âtri quotidiàn, comme "IL SECOLO XIX" E "LA REPUBBLICA - IL LAVORO" e "IL CORRIERE MERCANTILE", essèndo giornâli che se òcupan speçìficamente de quànto o capita a Zêna, no an evidenteménte ritegnûo oportûno dilungâse in sce 'na facénda comme quella de cui se pârla in sce sta pàgina, ch'apparenteménte a no l'à ninte a che fâ con Zêna.
